---
title: "വിജിലൻസ് അന്വേഷണങ്ങൾക്ക് വേഗം കൂട്ടാൻ വിഎസിബി സ്യൂട്ട് 3.0; ഉദ്ഘാടനം ചെയ്ത് മന്ത്രി രമേശ് ചെന്നിത്തല"
english_title: "Vigilance Hi Tech VACB Suit 3.0 Digital Platform Inauguration Home Minister Ramesh Chennithala State Police Media Centre Thycaud"
publisher: "newskozhikode.in"
canonical_url: "https://kozhikode.truevisionnews.com/news/384280/vigilance-hitech-vacb-suit-3-digital-platform-inauguration-ramesh-chennithala-thycaud-police-training-college"
published_at: "2026-09-26T12:56:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6ab774152679f_vigilance-hitech-vacb-suit-3-digital-platform-inauguration-ramesh-chennithala-thycaud-police-training-college1.jpg"
keywords: ["VACB Suit 3.0", "Kerala Vigilance", "Ramesh Chennithala", "Vigilance Digital Platform", "State Police Media Centre"]
---

# വിജിലൻസ് അന്വേഷണങ്ങൾക്ക് വേഗം കൂട്ടാൻ വിഎസിബി സ്യൂട്ട് 3.0; ഉദ്ഘാടനം ചെയ്ത് മന്ത്രി രമേശ് ചെന്നിത്തല

> **Lead Summary:** കോഴിക്കോട്: സംസ്ഥാന വിജിലൻസിനെ ഹൈടെക് നിലവാരത്തിലേക്ക് ഉയർത്തുന്ന വിഎസിബി സ്യൂട്ട് 3.0 ഡിജിറ്റൽ പ്ലാറ്റ്ഫോമിന്റെ ഉദ്ഘാടനം ആഭ്യന്തര വിജിലൻസ് വകുപ്പ് മന്ത്രി രമേശ് ചെന്നിത്തല നിർവഹിച്ചതായി സ്റ്റേറ്റ് പോലീസ് മീഡിയ സെന്റർ അറിയിച്ചു. 25.09.2026 ന് തൈക്കാട് പോലീസ് ട്രെയിനിംഗ് കോളേജിലെ മൈൻഡ് ആഡിറ്റോറിയത്തിൽ നടന്ന ചടങ്ങിലാണ് ഉദ്ഘാടനം നടന്നത്.

## Article Content

കോഴിക്കോട്: സംസ്ഥാന വിജിലൻസിനെ ഹൈടെക് നിലവാരത്തിലേക്ക് ഉയർത്തുന്ന വിഎസിബി സ്യൂട്ട് 3.0 ഡിജിറ്റൽ പ്ലാറ്റ്ഫോമിന്റെ ഉദ്ഘാടനം ആഭ്യന്തര വിജിലൻസ് വകുപ്പ് മന്ത്രി രമേശ് ചെന്നിത്തല നിർവഹിച്ചതായി സ്റ്റേറ്റ് പോലീസ് മീഡിയ സെന്റർ അറിയിച്ചു. 25.09.2026 ന് തൈക്കാട് പോലീസ് ട്രെയിനിംഗ് കോളേജിലെ മൈൻഡ് ആഡിറ്റോറിയത്തിൽ നടന്ന ചടങ്ങിലാണ് ഉദ്ഘാടനം നടന്നത്.

വിജിലൻസ് അന്വേഷണത്തിൽ നേരിട്ടുകൊണ്ടിരിക്കുന്ന കാലതാമസത്തിന് ഒരു പരിധിവരെ പരിഹാരമാകുന്നതാണ് പുതിയ സംവിധാനമെന്ന് മന്ത്രി പറഞ്ഞതായി പത്രക്കുറിപ്പിൽ പറയുന്നു. അത്യാധുനിക സാങ്കേതിക വിദ്യയുടെ സഹായത്തോടെ കേസുകളുടെയും അവയിന്മേലുള്ള അന്വേഷണങ്ങളുടെയും വിവരങ്ങൾ ഇനിമുതൽ ഡിജിറ്റൽ ഡാറ്റാ രൂപത്തിൽ ലഭിക്കും. വിജിലൻസ് ആൻഡ് ആന്റികറപ്ഷൻ ബ്യൂറോയുടെ നവീകരിച്ച ഡിജിറ്റൽ പ്ലാറ്റ്ഫോമാണ് വിഎസിബി സ്യൂട്ട് 3.0.

വിജിലൻസ് കേസുകളുടെ അന്വേഷണത്തിനും ഏകോപനത്തിനും വേണ്ടിയുള്ള ഒരു സംയോജിത ഡിജിറ്റൽ പ്ലാറ്റ്ഫോമാണ് വിഎസിബി സ്യൂട്ട് 3.0 എന്ന് മന്ത്രി അറിയിച്ചു. രേഖകളുടെ മികച്ച പരിശോധനാ സംവിധാനം, ഡാറ്റാ സുരക്ഷിതത്വം, നിർവഹണവേഗത, ഉദ്യോഗസ്ഥ തലത്തിലുള്ള കാര്യക്ഷമമായ മേൽനോട്ടം തുടങ്ങിയവയാണ് പുതിയ സംവിധാനത്തിന്റെ സവിശേഷതകൾ. പൂർണമായും ബ്യൂറോയിലെ തന്നെ സാങ്കേതിക വിദഗ്ധരാണ് ഇത് വികസിപ്പിച്ചെടുത്തത് എന്ന പ്രത്യേകതയും ഇതിനുണ്ടെന്ന് അദ്ദേഹം പറഞ്ഞു.

കേസന്വേഷണം സംബന്ധിച്ച എല്ലാ വിവരങ്ങളും ഡിജിറ്റൽ രൂപത്തിൽ ലഭ്യമാകുന്നത് അഴിമതിക്കെതിരെയുള്ള പ്രവർത്തനങ്ങളിൽ സർക്കാരിനും വകുപ്പിനും കൃത്യവും സമയബന്ധിതവുമായ തീരുമാനങ്ങൾ എടുക്കാൻ സഹായിക്കുമെന്നും മന്ത്രി കൂട്ടിച്ചേർത്തു. യൂണിറ്റ് മേധാവികൾക്കും മുതിർന്ന ഉദ്യോഗസ്ഥർക്കും അന്വേഷണത്തിന് ഫലപ്രദമായി മേൽനോട്ടം വഹിക്കുന്നതിനുള്ള നിരവധി സൗകര്യങ്ങൾ ആപ്ലിക്കേഷനിൽ ഉൾപ്പെടുത്തിയിട്ടുണ്ട്. ഓരോ അന്വേഷണ ഉദ്യോഗസ്ഥനും അന്വേഷണം പൂർത്തിയാക്കാൻ എത്ര ദിവസം എടുക്കുന്നു, ഓരോ കേസും എത്ര ദിവസമായി തീർപ്പാക്കാതെ കിടക്കുന്നു എന്നിവ കൃത്യമായി മനസ്സിലാക്കാൻ മുതിർന്ന ഉദ്യോഗസ്ഥർക്ക് സാധിക്കുമെന്നും അദ്ദേഹം പറഞ്ഞു.

വിഎസിബി സ്യൂട്ട് 3.0 യുടെ ഉപയോഗത്തിനായുള്ള മാനുവലിന്റെ പ്രകാശനം, പുതുതായി രൂപകൽപ്പന ചെയ്ത യൂണിഫോമിന്റെ വിതരണം എന്നിവയും ആഭ്യന്തര മന്ത്രി നിർവഹിച്ചതായി പത്രക്കുറിപ്പിൽ പറയുന്നു. രാഷ്ട്രപതിയുടെ പുരസ്കാരങ്ങൾ നേടിയ വിജിലൻസ് ഉദ്യോഗസ്ഥർ അടക്കമുള്ളവർക്കുള്ള ബാഡ്ജ് ഓഫ് ഹോണറിന്റെ വിതരണവും അദ്ദേഹം നിർവഹിച്ചു.

ചടങ്ങിൽ സംസ്ഥാന പോലീസ് മേധാവി റവാഡ ആസാദ് ചന്ദ്ര ശേഖർ അധ്യക്ഷത വഹിച്ചു. ഡിജിപിയും വിജിലൻസ് ആൻഡ് ആന്റി കറപ്ഷൻ ബ്യൂറോ ഡയറക്ടറുമായ മനോജ് എബ്രഹാം സ്വാഗതം ആശംസിച്ചു. ആഭ്യന്തര വകുപ്പ് ഉപദേഷ്ടാവും മുൻ ഡിജിപിയുമായ എ. ഹേമചന്ദ്രൻ മുഖ്യാതിഥിയായി. വിജിലൻസ് ആൻഡ് ആന്റി കറപ്ഷൻ ബ്യൂറോ ആസ്ഥാനത്തെ എസ്പി എസ്.ആർ ജ്യോതിഷ് കുമാർ ആശംസകൾ അർപ്പിച്ചു.

വിജിലൻസ് ഇന്റലിജൻസ് എസ്പി ഉജ്ജ്വൽ കുമാർ നന്ദി പറഞ്ഞു. ചടങ്ങിന് ശേഷം വിജിലൻസ് ഉദ്യോഗസ്ഥർക്കായി പ്രത്യേക പരിശീലന പരിപാടിയും സംഘടിപ്പിച്ചിരുന്നതായി സ്റ്റേറ്റ് പോലീസ് മീഡിയ സെന്റർ ഡെപ്യൂട്ടി ഡയറക്ടർ ഡോ. അഞ്ചൽ കൃഷ്ണകുമാർ അറിയിച്ചു.

**English Summary: **

State Vigilance is now hi-tech with the launch of VACB Suit 3.0, an upgraded digital platform. Home Minister Ramesh Chennithala inaugurated it at the Police Training College, Thycaud on 25.09.2026, according to State Police Media Centre. The platform, developed by VACB technical experts, will digitize case data, ensure data security, and enable effective supervision to reduce delays in vigilance probes.

### Related Links & Sources
- [Original Story Source](https://kozhikode.truevisionnews.com/news/384280/vigilance-hitech-vacb-suit-3-digital-platform-inauguration-ramesh-chennithala-thycaud-police-training-college)