---
title: " 'യാത്രയ്ക്ക് സർക്കാർ ഖജനാവിൽ നിന്ന് പണം ചെലവില്ല', ആരോപണങ്ങൾക്ക് പിന്നാലെ വീഡിയോ സന്ദേശം; അമേരിക്കൻ യാത്രയുടെ ചെലവ് വ്യക്തമാക്കി രമേശ് ചെന്നിത്തല"
english_title: "Ramesh Chennithala US Trip Not Government Expense Facebook Clarification Sam Pitroda Meeting"
publisher: "newskozhikode.in"
canonical_url: "https://kozhikode.truevisionnews.com/news/382769/ramesh-chennithala-us-trip-clarification-not-government-expense-facebook-video"
published_at: "2026-09-15T15:58:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6aa91f42a2831_ramesh-chennithala-us-trip-clarification-not-government-expense-facebook-video.jpg"
keywords: ["Ramesh Chennithala", "US Visit", "Sam Pitroda", "Kerala Home Minister"]
---

#  'യാത്രയ്ക്ക് സർക്കാർ ഖജനാവിൽ നിന്ന് പണം ചെലവില്ല', ആരോപണങ്ങൾക്ക് പിന്നാലെ വീഡിയോ സന്ദേശം; അമേരിക്കൻ യാത്രയുടെ ചെലവ് വ്യക്തമാക്കി രമേശ് ചെന്നിത്തല

> **Lead Summary:** തിരുവനന്തപുരം: അമേരിക്കൻ സന്ദർശനവുമായി ബന്ധപ്പെട്ട് ഉയർന്ന ആരോപണങ്ങൾക്ക് വിശദീകരണവുമായി ആഭ്യന്തര മന്ത്രി രമേശ് ചെന്നിത്തല. തന്റെ അമേരിക്കൻ യാത്ര സർക്കാർ ചെലവിലല്ലെന്നും സംഘാടകരുടെ ചെലവിലാണ് യാത്ര നടത്തിയതെന്നും മന്ത്രി വ്യക്തമാക്കി.

## Article Content

തിരുവനന്തപുരം: അമേരിക്കൻ സന്ദർശനവുമായി ബന്ധപ്പെട്ട് ഉയർന്ന ആരോപണങ്ങൾക്ക് വിശദീകരണവുമായി ആഭ്യന്തര മന്ത്രി രമേശ് ചെന്നിത്തല. തന്റെ അമേരിക്കൻ യാത്ര സർക്കാർ ചെലവിലല്ലെന്നും സംഘാടകരുടെ ചെലവിലാണ് യാത്ര നടത്തിയതെന്നും മന്ത്രി വ്യക്തമാക്കി.

ഫെയ്‌സ്ബുക്കിൽ പങ്കുവച്ച വീഡിയോ സന്ദേശത്തിലൂടെയാണ് അദ്ദേഹം ആരോപണങ്ങൾക്ക് മറുപടി നൽകിയത്. ജയ്ഹിന്ദ് ടിവിയുടെ ആദ്യകാല നേതൃനിരയിൽ ഉണ്ടായിരുന്ന ഫെലിക്‌സ് സൈമണിന്റെ മകന്റെ വിവാഹത്തിൽ പങ്കെടുക്കുന്നതിനായാണ് രമേശ് ചെന്നിത്തല കുടുംബസമേതം അമേരിക്കയിലെത്തിയത്.

സന്ദർശനത്തിന്റെ ഭാഗമായി അമേരിക്കയിലെ വിവിധ മലയാളി സംഘടനകൾ സംഘടിപ്പിച്ച പരിപാടികളിലും ഓണാഘോഷങ്ങളിലും മന്ത്രി പങ്കെടുത്തു. കേരള കോൺഗ്രസ് (എം) നേതാവ് ജോസ് കെ. മാണിയടക്കമുള്ളവരും സന്ദർശനത്തിന്റെ ഭാഗമായി ഒപ്പമുണ്ടായിരുന്നു.

ചിക്കാഗോയിൽ ഇന്ത്യൻ ടെലികോം വിപ്ലവത്തിന്റെ ശില്പിയായ സാം പിത്രോദയുമായി നടത്തിയ കൂടിക്കാഴ്ചയും അമേരിക്കൻ സന്ദർശനത്തിലെ പ്രധാന പരിപാടിയായി. രാജീവ് ഗാന്ധിയുടെ കാലത്ത് ഇന്ത്യയെ സാങ്കേതികവിദ്യയുടെ പുതുയുഗത്തിലേക്ക് നയിച്ച സാം പിത്രോദയുടെ കാഴ്ചപ്പാടുകൾ ഡിജിറ്റൽ കാലഘട്ടത്തിലും പ്രസക്തമാണെന്ന് രമേശ് ചെന്നിത്തല പറഞ്ഞു.

വ്യക്തിവിവരങ്ങളുടെ സ്വകാര്യത, ഡാറ്റയുടെ ഉടമസ്ഥതയും നിയന്ത്രണവും പൗരന്മാർക്ക് ഉറപ്പാക്കേണ്ടതിന്റെ ആവശ്യകത, അഭിപ്രായ സ്വാതന്ത്ര്യത്തോടൊപ്പം ഡിജിറ്റൽ ഇടങ്ങളിലെ ഉത്തരവാദിത്തബോധം ഉറപ്പാക്കേണ്ടത് തുടങ്ങിയ വിഷയങ്ങൾ കൂടിക്കാഴ്ചയിൽ ചർച്ച ചെയ്തതായി മന്ത്രി പറഞ്ഞു.

ലോകത്തിന്റെ വിവിധ ഭാഗങ്ങളിലുള്ള ഇന്ത്യൻ പ്രതിഭകളുടെ അറിവും വൈദഗ്ധ്യവും രാജ്യത്തിന്റെ വികസനത്തിനായി എങ്ങനെ പ്രയോജനപ്പെടുത്താമെന്നതും ഇരുവരും ചർച്ച ചെയ്തു.

കേരളത്തിന്റെ ഉയർന്ന പൗരബോധത്തെയും സാക്ഷരതയെയും സാം പിത്രോദ പ്രത്യേകം പ്രശംസിച്ചതായും രമേശ് ചെന്നിത്തല പറഞ്ഞു. വോട്ട് രേഖപ്പെടുത്തുന്നതിനായി മാത്രം വിമാനടിക്കറ്റെടുത്ത് നാട്ടിലെത്തുന്ന മലയാളികളുടെ ജനാധിപത്യ ബോധം മറ്റെവിടെയും കാണാനാകില്ലെന്ന സാം പിത്രോദയുടെ പരാമർശവും മന്ത്രി സാമൂഹ്യമാധ്യമങ്ങളിലെ കുറിപ്പിൽ പങ്കുവച്ചു.

ചിക്കാഗോയിലെ സാം പിത്രോദയുടെ സ്റ്റുഡിയോയും രമേശ് ചെന്നിത്തല സന്ദർശിച്ചു. ഇതിലൂടെ സാം പിത്രോദയിലെ കലാകാരനെയും നേരിട്ട് പരിചയപ്പെടാൻ കഴിഞ്ഞതായി മന്ത്രി പറഞ്ഞു.

അതേസമയം, ആഭ്യന്തര മന്ത്രിയുടെ അമേരിക്കൻ യാത്രയെക്കുറിച്ച് വിവിധ ആരോപണങ്ങളും പ്രചാരണങ്ങളും ഉയർന്നിരുന്നു. ഇതിന് പിന്നാലെയാണ് മന്ത്രി വീഡിയോ സന്ദേശത്തിലൂടെ വിശദീകരണം നൽകിയത്.

> “സർക്കാർ ചെലവിലല്ല ഈ അമേരിക്കൻ യാത്ര, സംഘാടകരുടെ ചെലവിലാണ്” എന്നായിരുന്നു ആരോപണങ്ങൾക്ക് രമേശ് ചെന്നിത്തല നൽകിയ നേരിട്ടുള്ള മറുപടി. യാത്രയുടെ ഉദ്ദേശ്യവും സന്ദർശനത്തിന്റെ പശ്ചാത്തലവും വ്യക്തമാക്കിയ മന്ത്രി, സർക്കാർ ഖജനാവിന് യാത്രയുമായി ബന്ധപ്പെട്ട് യാതൊരു ചെലവുമില്ലെന്നും വ്യക്തമാക്കി.

**English Summary:**

Home Minister Ramesh Chennithala responded via Facebook video to allegations over US visit, saying trip was not at government expense but borne by organizers. He went with family to attend wedding of Felix Simon's son, former JaiHind TV leader, and attended Malayali events and Onam programs with KC(M) leader Jose K Mani. Met Sam Pitroda in Chicago, discussed data privacy, data ownership, digital responsibility with free speech, leveraging diaspora talent. Said Pitroda praised Kerala's civic sense, literacy and democratic spirit of Malayalis flying home just to vote. He visited Pitroda's Chicago studio. Clarified no cost to state exchequer.

### Related Links & Sources
- [Original Story Source](https://kozhikode.truevisionnews.com/news/382769/ramesh-chennithala-us-trip-clarification-not-government-expense-facebook-video)